Sparebanken Sogn og Fjordane Open

Sandvolleyball

 

Sol og Sommar:

Sjå kva veret blir på neste turnering

 

 

 

 

Sesongslutt

Lørdag 19. august vart det avvikla krinsmesterskap i Sandvolleyball. Dette var også siste turnering i krinsserien i sandvolleyball, Sparebanken Sogn og Fjordane Open. Herreklassen talde 5 lag og var prega av eliteseriespelarane frå Førde. Nils Numme, som stod over NM denne helga, tok heim tittelen saman med Arild Undheim. I finalen slo dei Oddbjørn By og Thomas Haug 2-0. Det var likevel dei sistnemnde som tok heim samanlagtsigeren i ssfopen.

 

For jenter U17 beviste Brita Kirkeeide og Linn Bakke at dei er det beste sandvolleyballparet i fylket. Dei vann krinsmesterskapet og samtidig si tredje turnering i ssfopen. Dermed vart dei også samanlagtvinnarar for sesongen. Dei to jentene kjem frå Jølster, men spelar innandørs for Førde. I finalen slo dei klubbveninnnene Mari Paulsen og Synne Berge frå Førde.

For gutar U17 var samanlagtsigeren i ssfopen klar allereie før den siste turneringa. Førdegutane Bendik Huus og Leonard Hornnes har vist stor stabilitet gjennom sesongen, og hadde eit forsprang på hundre poeng ned til neste lag. Dei to er samtidig blant dei yngste spelarane, og vann også samanlagt i klassen for gutar U15. Krinsmesterskapet gjekk til NM-finalistane Lage Jarning og Sondre Valaker. I finalen vann dei over Fossen/Kvamme som også kom frå NM-spel i denne årsklassen

Resultat frå KM

Herrar

  1. Numme/Undheim (Førde)
  2. Haug/By (Førde)
  3. Kvammen/Haug (Førde)
  4. Tvinde/Nilsen (Førde)
  5. Myrmel/Storøy (Førde/Naustdal)

Gutar U17

1.      Valaker/Jarning (Førde)

2.      Fossen/Kvamme (Førde)

3.      Tundal/Holsæter (Førde)

4.      Hornnes/Welle (Førde)

5.      Aalen/Braastad (Askvoll)

Carlsen/Søreide (Stongfjorden)

Eikaas/Holsen (Førde)

Jenter U17

  1. Bakke/Kirkeeide (Jølster)
  2. Paulsen/Berge (Førde)
  3. Standal/Farsund (Naustdal/Førde)
  4. Nes/Nes (Viksdalen)
  5. Hundvebakke/Haveland (Jølster)
  6. Vallestad/Gjermundstad (Viksdalen)
  7. Fosse/Berge (Førde)
  8. Nilsen/Kvammen (Jølster)

Samanlagtvinnarar 2006

Sparebanken Sogn og Fjordane Open 2006

Jenter U15:

Nora Karoline Berge / Elisabeth Fosse

Gutar U15:

Bendik Huus / Leonard Hornnes

Jenter U17:

Linn Nesje Bakke / Brita Kirkeeide

Gutar U17:

Bendik Huus / Leonard Hornnes

Herrar:

Oddbjørn By / Thomas Haug

Damer:

Randi Marie Hukset / Mari Cecilie Haug

Volleyballskule søndag

Sidan alle kampane blir avvikla lørdag, blir søndagen sett av til ein volleyballskule med Nils Numme. Dette er eit gratistilbod for alle som har delteke i ei eller fleire av turneringane i år. Dersom det vert stor deltaking vil vi måtte sette eit tak. Då vil dei første som melder seg på få vere med. Påmelding kan gjerast i sekretæriatet under km på laurdagen.

Treningsøkta startar kl 10:00 på banene ved Hafstad vgs og varer fram til ca kl 13:00.

 

Herreklassen startar kl 10

I skrivande stund fredag kveld er det påmeldt 4 herrelag. Det er nok til turnering, men det ryktast at det er nokre fleire lag som vil melde seg på i kveld. Dermed blir det ikkje lag noko oppsett, men alle laga møter opp på bana ved barneskulen før kl 10, og så startar kampane straks.

Oppsett for KM

Påmeldingsfristen er ute og oppsettet er stort sett klart. Klassane for U15 og U17 er slått saman. Det deltek 8 lag i kvar av desse klassane. Merk at alle kampane vert spelte på lørdag. Første kamp startar kl 10. Guteklassen og jenteklassen går på kvar si bane ved Hafstad vgs. Dameklassen og jenter U20 går ut. Gutar U20 og herrar er slege saman og vert spelt på bana ved Førde barneskule. Også her startar første kamp kl 10, men det er framleis nokre ledige plassar her så oppsettet er ikkje heilt ferdig.

Tidsplan for lørdagen med ranking.

Grafisk oppsett for gutar U17.

Grafisk oppsett for jenter U17.

 

Volleyballskule med Nils Numme

Nils Numme er ein av Norges beste volleyballspelarar. Han er sentral på landslaget innandørs, og har også stor erfaring frå sandvolleyball. Sist vinter spela han sandvolley i Brasil saman med nokon av verdens beste utøvarar av sporten. Under KM i Førde vil han saman med Stig Myrmel frå Førde sitt elitelag halde ein liten sandvoleyballskule for deltakarane  i aldersbestemte klassar. Dette vil vere gratis for alle deltakarane, og bli lagt inn i tidsskjemaet for helga. Dette er ein unik sjanse for unge talent i krinsen  til å lære av dei beste.

 

Avsluttande ranking 

 Turneringa i Førde er som kjent den siste turneringa i Sparebanken Sogn og Fjordane Open 2006. Det vert premiering av dei beste laga gjennom sesongen.  Rankingpoeng blir samla individuelt, og det er dette som er grunnlag for seeding av lag.  Som i jenter U17 kan det då vere ein enkelt person som toppar totalrankinga. Det vil likevel vere det laget som har samla mest poeng som vinn lagkonkurransen. Dersom to lag har lik poengsum vil ein først sjå på dei beste plasseringane. Då vil ein førsteplass gå foran to femteplassar. Dersom plasseringane er like vil poengsumane frå turneringane med flest deltakande lag telje mest. Det vil altså bety vere betre å vinne ei turnering med 10 lag enn ei turnering med fem lag. Dersom også dette skulle vere likt vil poeng samla sist telje mest.

Oppdatert totalranking med lagpoeng.

 

Førde 19.-20.august

Den siste turneringa for året går i Førde 19. og 20. august. Denne turneringa har også status som krinsmesterskap. Vi ventar god deltaking på denne turneringa, så alle deltakarane må halde seg til påmeldingsfristen som er onsdag 16. august kl 21:00. Då vil oppsette bli laga. Dei som melder seg på seinare enn dette kan ikkje rekne med å få delta.

Klassane for senior, U20 og U15 vil gå på lørdag. Truleg blir U20 slått saman med senior. Klassane for U17 går på søndag.

Avlysing i Hornindal

På grunn av lav påmelding i alle klassar vart turneringa i Hornindal avlyst.

Hornindal 12-13. august

Komande helg  vert det turnering i Hornindal. Dette er ein av dei mest tradisjonsrike volleyballmiljøai krinsen, og vi ser fram til sterk lokal deltaking her.  Det er no svært jamt på totalrankinga, særleg i U17, så vi håpar at også Sunnfjordlaga vil nytte høvet til å besøke nordfjordbygda. Som vanleg kan vi nok rekne med sol, sommar og flott volleyball. 

Tvinde/Holsæter vann i Naustdal

I turneringa i Naustdal søndag vann Lars Fredrik Tvinde og Ruben Holsæter finalen mot Bendik Huus og Leonard Hornnes. Det var ei svært jamn turnering med mykje god volleyball frå alle lag. På bildet er vinnarane i angrep mot Fossen/Kvamme. Det vart også ei spanande mixturnering. Helge Erdal og Inger Johanne Rognebakke Walstad gjekk av med sigeren der.

Oppdatert totalranking.

 

Kampoppsett 6. august

 Oppsetter for gutar U17 er no klart. Første kamp går kl 10 som tidlegare annonsert. Både damer og JU20 går ut. I staden vert det arrangert ei ad-hoc mix-turnering, etter ønske frå dagens badegjester på Naustdalsanden. Den turneringa startar kl 12.

Kampoppsett for søndagen.

Ny siger til Bakke/Kirkeeide

Bakke og Kirkeeide frå Jølster blei dei første som klarte å vinne to turneringar i Sparebanken Sogn og Fjordane Open. Dei fekk hard matching og tapte ein tidleg kamp mot Farsund/Paulsen frå Førde. Dei måtte derfor gå gjennom den tyngre vegen i eliminasjonsrundene. I finalen møtte dei førdejentene til revansj og vann ein solid 2-0 siger. Bildet viser dei blide vinnarane til høgre, og dei nesten like blide motstandarane. På herresida vart det siger til dei regjerande juniornorgesmestrane Ruben Inderøy og Vegard Holsen. Dei vann finalen overbevisande mot Jon Jarning og Rodmund I Lida. Begge laga kjem frå Førde.

Oppdatert totalranking.

 

Kampoppsett 5. august

 Klassane for gutar U15 og gutar U20 går ut. Lørdag blir det turnering for herrar og jenter U17. Jentene startar kl 10, og herrane startar kl 13. Begge klassane vert avslutta ca samtidig, kl 17.

Tidsplan og oppsett for lørdagen.

Grafisk oppsett for jenter U17.

Naustdal 5.-6. august

Etter ei turneringspause i fellesferien er det no klart for ny turnering i Naustdal 5. og 6. august. Påmeldingsfrist blir onsdag 2.august for alle klassar. Tambarskjelvar legg opp til ein skikkeleg sommarfest med mykje liv, musikk og tilleggsaktivitetar som vannski og tubing. 

Detaljar om turneringa i Naustdal.

Resultat og ranking frå Vik

Resultata frå turneringa i Vik er no tekne med i den siste oppdaterte rankinga. I gutar U17 har Christian Engelstad overteke toppen av rankinga frå Huus og Hornnes som ikkje deltok i Vik. Denne klassen ser ut til å verte svært jamn. Det same er tilfelle på jentesida. Der vart det ikkje noko endring heilt i toppen, men det er mange lag som kjempar tett. Elles er det gledeleg at herreklassen vart den mest talrike til no i sesongen. Vi håpar endå fleire vil kaste seg med når dei siste turneringane går av stabelen i August.

Turnering i Vik

Neste turnering går som kjent i Vik. På grunn av ferieavvikling vil nyheiter om denne turneringa bli publiserte både her, i bloggen og på Vik IL sine nettsider De må difor følgje med på alle desse linkane for oppdateringar.

 

Regntung turneringsdag

Til trass for at det regna jamt og trutt vart det spela mykje god volleyball på Svidalsøyra. Biletet viser førdejentene Nora Karoline Berge og Elisabeth Fosse som vann  JU15.  I klassen for gutar U17 vart det ein svært jamn finale der Runar Eikenes og Torbjørn Holsen trakk det lengste strået.

 

 

 

Heimesiger på Jølster i JU17.

Jølsterjentene Brita Jordanger Kirkeeide og Linn Nesje Bakke vann klassen for jenter U17.

I oppvisningsstil feia dei all motstand til side. Bilete viser Bakke i eit luftig svev.

Sjå fullstendig resultatliste under turneringar.

 

 

 

 

Klart for turnering i Jølster

Det blir jenter U17 på laurdag, og gutar U17 saman med jenter U15 på søndag.

Oppsettet ligg under turneringar. Føl også med på nyheitsbloggen. 

 

Første turnering over.

Med strålande vær mandag kunne spelarar og arrangør kose seg over ein nydeleg arrangementsdag.

 Gutar U17 er den største klassen i turneringa, og fekk også det beste været. Biletet viser Sondre Valaker i aksjon ved nettet under finalen. Resultata frå andre pinsedag finn du under turneringar.

 

 

 

Flott dag for sandvolley.

Etter avlysinga lørdag vart det ei flott turnering i sanden på søndagen.

Haugar i nettduell Med unntak av nokre få regnbyger var det lange gløtt av sol og eit knirkefritt arrangement. Resultat finn du under turneringar. På bilete ser vi brødrene Haug i nettduell. På kvart sitt lag kom dei på første og andre plass i herreturneringa

 

 

Laurdagskampane utsett

Det var overflatevatn på banene i dag tdleg (laurdag) og vi har difor valt å utsetje til søndag og mandag. Meldingane er betre framover.

Klassen for jenter U17 vil vi avvikle på søndag. Det vil difor kome ny tidsplan for søndagen, også for dei andre klassane som skal spelast då.

Klassen for gutar U17 vil bli spelt på måndag.

 

Sandvolleyball

Sogn og Fjordane Volleyballkrins har inngått ein samarbeidsavtale med Sparebanken Sogn og Fjordane om ein fylkesdekkande serie for sandvolleyball.

Som serie er dette eit heilt nytt konsept. Tdlegare har det berre vore arrangert KM og nasjonale turneringar i sandvolleyball. Krinsen prøver med dette å få til eit lokalt konkurransetilbod til både juniorar og seniorar.

Det vil bli halde fleire enkeltståande turneringar rundt i fylket. Ein kan delta på ei eller fleire turneringar og ein kan skifte makker mellom dei ulike turneringane. Spelarane mottek individuelle rankingpoeng for plasseringa i kvar turnering. Dette er eit system ein kan kjenne igjen frå dei nasjonale Fanta Open turneringane som har vore arrangert tidlegare år.

Det blir spelt "vanleg" sandvolleyball i alle klassar, dvs to spelarar på kvart lag og ingen innbyttarar.